සදාකාලික ප්‍රේමය?

 

අද සමාජයේ ජීවත් වෙන බොහෝ දෙනා එක පාරකට වැඩිය ප්‍රේම සම්බන්ධතා ඇති කරගෙන තියෙනවා. සමහරු ඇත්තටම ආදරේ නිසාත්, තවත් සමහරු වෙනත් ලාභ ප්‍රයෝජන නිසාත් මේ සම්බන්ධතා ඇති කර ගන්නවා. මුලු ජීවිත කාලය පුරාවටම රඳා පවතින ආදරයක් හා සම්බන්ධතාවයක් ඇති කර ගන්නේ කොහොමද?

මං හිතන්නේ ඒකට වඩාත්ම වැදගත් වෙන්නේ එකිනෙකාගේ තේරුම් ගැනීම. අපි කාටහරි මුලින්ම කැමති වෙන්නේ ඒ කෙනාගේ බාහිර රූපෙට. ඊට පස්සේ දෙන්නට දෙන්නා කැමති නම් සම්බන්ධතාවයක් ගොඩ නගා ගන්නවා. ඒත් එය පටන් ගන්න අවස්ථාවේදී එකිනෙකාගේ සිතුම් පැතුම්, හැසීරීම් ගැන අවබෝධයක් දෙදෙනා ළඟම නැහැ. ටික කලක් යනකොට තමයි දෙදෙනාගේ සිතුම් පැතුම්, හැසිරීම් ගැන අවබෝධයක් ලැබෙන්නේ. ගොඩක් වෙලාවට අපි කරන්න හදන්නේ තමන් අකමැති ගතිගුණයක් අනෙකා තුල තියෙනවානම් ඒක අපි කැමති විදිහට වෙනස් කරන්න උත්සාහ කරන එක. ඒ ගතිගුණ ගැන තේරුම් අරගෙන ඒවා වෙනස් නොකර දිගටම සම්බන්ධය ගෙනියන්න ගොඩක් වෙලාවට අපේ හිත් වලට අපහසුයි.

මේ තත්ත්වය තව උග්‍ර වෙනවා දෙදෙනා එකතු වෙලා විවාහ ජීවිතයක් පටන් ගත්තහම. විවාහයට කලින් ප්‍රේම සම්බන්ධය ඇති කාලයේ එකිනෙකා මුණ ගැහෙන්නේ යම් කාල සීමාවක් ඇතුලත. මේ කාලසීමාව තුල දෙදෙනා පුරුදු වෙලා ඉන්නේ අනිත් කෙනාට කැමති විදිහට හැසිරෙන්න. එම නිසා ගොඩක් වෙලාවට එකිනෙකාව හරි විදිහට තේරුම් ගැනීම ටිකක් අපහසු වෙනවා. ඒත් විවාහ උනාට පසුව දෙදෙනා හැමතිස්සෙම ජීවත් වෙන්නේ එකට. එහෙම ටික කලක් ඉන්නකොට අනෙකාට කැමති විදිහට හැමතිස්සේම ජීවත් වෙන්න අපහසුයි. ටික කලකින් තමන්ගේ සුපුරුදු ප්‍රතිරූපය එළියට එනවා. එහෙමත් නැත්නම් විවාහය ඇතුලේ තමන් සාමාන්‍ය විදිහට ජීවත් වෙන්න පටන් ගන්නවා. එහෙම උනහම ගොඩක් වෙලාවට අහන්න ලැබෙන කතාවක් තමයි "ඔයා ඉස්සර වගේ නෙමෙයි, බැන්දට පස්සේ ඔයා හරිම වෙනස්" කියන එක.

තමන් කොච්චර ආදරේ උනත් අනෙකාගේ අකමැති ගතිගුණ විඳ දරා ගන්න අපේ හිත් ලෑස්ති නැහැ. කොහොමහරි උත්සාහ කරනවා ඒ ගතිගුණ වෙනස් කරන්න. සමහර පුංචි පුංචි දේවල් වෙන්න පුලුවන්. ඒත් මේ පුංචි පුංචි දේවල් පුංචි පුංචි රණ්ඩු වලට පෙරලෙන්නේ අපි නොදැනුවත්වමයි. ටික කාලෙකින් ඒවා ලොකු රණ්ඩු වලට පෙරලෙනවා. ඉන්පසු දෙදෙනාගේ සම්බන්ධය නවත්වනවා, එහෙමත් නැත්නම් දික්කසාද වෙනවා.

අද සමාජය දිහා බැලුවහම හැම බැඳීමකටම මේ දේ පොදුයි. ඒත් මේ රණ්ඩු, හිත් අමනාපකම් අවම කරගෙන හැමදාම ආදරෙන් ජීවත් වෙන්න පුලුවන්ද? අනෙකාව තේරුම් අරගෙන, ඔහුගේ හෝ ඇයගේ වැරදි තේරුම් අරගෙන ඒවත් එක්ක ජිවත් වෙන්න පුලුවන්නම් හැමදාම ආදරෙන් ඉන්න පුලුවන් වෙයි. අපි හිතනවා මම එයා වෙනුවෙන් වෙනස් උනානම් ඇයි එයාට මම වෙනුවෙන් වෙනස් වෙන්න බැරි කියලා. අපි කවුරුවත් සර්ව සම්පූර්ණ මිනිස්සු නෙමෙයි. කුඩා කල ඉඳන්ම තමන් හැදුන විදිහ, හිතන්න පුරුදු වුන විදිහ වෙනස් කරන්න ගොඩක් අමාරුයි. තමන් වෙනස් උනත්, වෙනස් වෙන්න පුලුවන් තරම් මානසිකත්වයක් අනිත් කෙනාට නැති වෙන්න පුලුවන්. මේ වගේ දේවල් නිසා ඇති වෙන බහින් බස් වීම් දුරදිග යවාගන්නේ නැතුව ඉවසීමෙන් අනෙකාව තේරුම් ගන්න උත්සාහ කරනවනම් හැමදාම ආදරෙන් ජීවත් වෙන්න පුලුවන් වෙයි.

 

“Be understanding.  We are all human.  You can never expect something from someone that you are not willing to do yourself.  As much as you may think your partner is Superman (or Superwoman), they are still human, and they have feelings just like you do.”